Tafsut n 80, 40 iseggasen aya…

Tafsut n 80, 40 iseggasen aya…
Tafsut d tasemhyut n uǧuǧeg d wezmumeg, d tallit n talalit d usemɣi n tgama. Tafsut d ussan n tayri d zzhu. Tafsut d asirem d tirga. Tafsut tesfaḍay imeṭṭi d uneɣni n tagrest tasemmaḍt, n tegrest taqesḥant d-ittaǧǧan urfan d ccwami deg umdan akked uɣersiw. Ferḥen medden mi ara d-tass, tmagaren-tt s wurar d yicewwiqen akked weglilez. Seg wasmi d-tebda ddunit, imdanen ferhen yes-s, snulfuyen-d kra yellan d azamul akken ad sfilten yes-s.
D tagi i d-tafsut!
Maca, tella tefsut nniḍen! Tafsut n Yimaziɣen! Deg leɛmer tecba tilemzit ; tilemzit n umezruy. Temmed 40 iseggasen kan, daya ! Mazal-itt tettmurud, mazal-itt d taqrurt! Nek s timmad-iw cfiɣ-as am wass-a asmi d-tlul s zzhir d lbarud d yimeǧǧiden. Zzhir-is, yuɣ akk tamurt n Leqbayel. Izwi allaɣen iṣebken d leqrun ma mačči drus. Teldi-d allen i wegdud i isbunedlen leqrun, tejbed-as amezzuɣ, temla-as lbaḍna. Lbaḍna n tudert-is, tin n umezruy-is i wumi yerra aɣummu udabu amesbaṭli s ddɣel.
Deg tefsut-nni, agdud aqbayli iḍegger ajellab n ddel d tmuḥeqranit; ikkes asaber i yimezzuɣen-is, isla i wanza n yimawlan-is mi s-id-yessawal akin i tizi n leqrun. Isla i yizen n Dda Lmulud d-yessawḍen izen n yimedyazen imezwura isersen llsas i teqbaylit ass 2O deg yebrir 1980! 80 d azgen n 40. D ssut-nni n At zik i d-ilḥan azgen n umecwar seg yimiren ar wass-a!
« Ma yella Taqbaylit tejreḥ uqabel Ṛuman », ihi « Leqbayel n tura, akka i asen-d-tegxra, msawan d yigujilen », segmi akken anebdu-nni d-iḍefren tafsut tazeggaɣt, ikcem-d s tewwurt n twaɣit tameqqrant s zzhir d ṛsas akken ad imger yiwet gar n tgejda n Teqbaylit. D asfel ur nezmir ad d-neɣrem.
Seg yimir-nni, anamek n tefsut ibeddel, tafsut tsaɣ am deg yal amkan, tegla-d s waṭas n tefsutin nniḍen, ula d tafsut taberkant isgujlen tiwaculin-nneɣ!
Tafsut n Uqbayli mačči am tiyid, mačči am tid n zik. Tafsut-nneɣ iman-is, tafsut-nneɣ d amezruy, tafsut-nneɣ d asmekti, tafsut-nneɣ d incib deg ubrid n umezruy. Tafsut-nneɣ d talalit tis snat, tafsut-nneɣ d tugdut, tafsut-nneɣ d tilelli, tafsut-nneɣ d asafu i yes-s nzer abrid deg tillas, tafsut-nneɣ d tayemmat n tlelliyin n wiyiḍ, tafsut-nneɣ d immal!

Ǧamal AREZQI, Paris, 17 d yebrir 2020.